Гьарун Кьурбанов гьаниркахъули Турнир бетерхур

ГIяхIгъабза итил дунъяличи арукьялра, илала хабар даимлис чеалкIуси наслубас гIибратли кавлуси саби. Дигеси саби илгъуна хабарла багьадурти гьанбиркахъути далдуцуни дурадуркIнира. ХIера, апрельла бехIбихьудличиб «Петровск» бикIуси гостиничный комплексла конференц-заллизиб Дагъистан Республикала пачалихъла ва жамигIятла-политикала хIяракатчи Гьарун МяхIяммадович Кьурбанов гьаниркахънилис хасбарибси лебил Россияла шашкабала абзанала шайчибси турнир дураберкIиб.

Балбуцлизир бутIакьяндеш дариб Россияла 18 регионнизибадти 42 шашистли. Илдала лугIилизиб лебри Крымлизивадси халкьани-ургавси гроссмейстер дунъяла чуйнал чемпион ветаурси Сергей Белошеев; Якутиялизивадси дунъяла, Европала, Россияла чемпион Иван Токусаров; Челябинсклизирадси дунъяла чемпионка Жанна Бупеева, Калугализирадси Европала чемпионка Юлия Медведева; Ростовла областьлизивадси гроссмейстер Сергей Александрин (ил ЮФО/СКФО-ла шашкабала Федерацияла председательра сай); 1977 ибил дуслизир СССР-ла чемпионка ретаурси гроссмейстер Людмила Петрова; Санкт-Петербурглизирадси гроссмейстер Ника Леопольдова; Брянскла областьла Жуковка шагьарлизирадси Россияла экс-чемпионка Анна Мортикова ва бахъал цархIилтира.

Илкьяйдали турнирличиб лебри декIар-декIарти регионтазибадти ва Дагъистаннизибадти спортла 13 мастер ва 23 КМС. Чечняла республикализивад вакIибси спортла мастер, Россияла дахъал турниртачив чедиикибси, 2021 ибил дуслизиб Северный Кавказла Кубок сархибси И. Хайтаев. Унраличибси республикала шайзирад бутIакьяндеш дариб спортла мастерти Минкаил Исраиловли ва Мовсар Кьасумовли. Турнирлизир бутIакьяндеш дарибтазивадли бегIлара камти гIямрула сайси Астраханнизивадси Дмитрий Сергеев 14 дусцун сайри виубси. БегIлара дахъал гIямру деркIибси СССР-ла чемпионка Л. Петрова 84 дус риубси сари.

Абзани детерхур Швейцарияла бетуц пайдалабарили (20 минут.+10 сек.) Цаибил бархIи классикализир авал тур дурадеркIибтири.

КIиэсил бархIи дурадеркIибти абзаназир лебилра шашистунани бутIакьяндеш дарибтири. Чедиикиб ил абзлизив гьар дуслизир Гьарун Кьурбановлис хасдарибти абзаназир бутIакьяндеш дируси Сергей Белошеев. Илини диэс хIяжатти 9 очколизирадли лерилра сархиб. КIиибил мер сархиб Жанна Бупеевани. ХIябъибил мерличи лайикьикиб гьар мурталраван Дагъистан Республикала шайзирадли бутIакьяндеш дарибси Убуша Ангряев. Авъибил мер бикиб халкьани-ургавси мастер Мажит Саршаевлис, шуэсил – Ника Леопольдовас.

Дагъистанна шашистуназивадли гIяхIсигъуна сайри турнирная таблицализиб 16 эсил къяйлизивси ИсмягIил ИсмягIилов.

ХIябэсил бархIи шашистуни классикала абзлизи каберхур. ИлхIелира Сергей Белошеев бусягIятал декIарухъун.

Турнирла призовой фонд лебгIеб халасири. Арцла шабагъатуни дедиб программала лерилра журабазир 1-5 ибти мерани дуцибтас. Илкьяйдали, арцла премияби дедиб ветеранти ва декIарбахъунти Дагъистайзибадти шашистунас. Оргкомитетли бегIлара халаси ва виштIаси шашистунасра арцла шабагъатуни дедиб. РФ-ла баркаллала кагъуртачил шабагъатлабариб турнирла бекI судья М. Н. Денежкин, организаторти – КМС-ла подвижникуни Батирай ва МяхIяммадрасул Зулпикьаровхъали, ДР-ла шашкабала Федерацияла вице-президент Арсен Адзиев. Оргкомитетли декIарухъунси болельщиклисра приз бедиб. Ил сайри Кизилюртлизивадси спортла мастердешлизи кандидат ХIясан Хузайпатов.

Турнирла судьябала коллегиялис бекIдеш дирулри халкьани-ургабси категорияла судья М. Н. Денежкинни. Илис кумекбирулри бекI судьяла заместитель П. А. Чирковли ва секретарь А. Х. ГIяхIмадовли.