Сархибдешуни вайти ахIен

Июльла бехIбихьудличиб администрациялизиб районна муниципалитетла бекI Жаруллагь ГIямаровли районна активличил барх совещание дураберкIиб. Ил балбуцличиб иш дусла цаибил байхъайзир шимала администрациябани налогуни лугнила план бирцIахънила масъала хIербариб. Ва илкьяйдали лебдешла отделла, муниципальный заказла ва юртани тIашдалтнила бузериличила багьахъниличира цалабикибти лехIбизур. Цаибил масъалала чевкад гъайухъун районна бекIла цаибил заместитель Рамазан НухIкьадиев. Илини бурни хIясибли, районна бюджетлизи налогунала ва цархIил тяхIярли дакIибти арцла кьадар 46 204 869 къурушличи халбирули саби. Лебилра планна 53 процентличи адикили сари илди. Илдала лугIилизир ГСМ-ла акцизунас дакIили сари 48 процент; НДФЛ – 52 процент; вмененный доходла цахIнабси налог — 15 процент; шила хозяйствола цахIнабси налог – 70 процент; адамтала мас-мулкличибадси налог – 62 процент; ванзала налог — 53 процент ва цархIилтира.

Дибгалик, Дибгаши, Кудагу, СутбукI, Хуршни, Меусиша и Морское шимани мас-мулклис 100 процентла, ЦIизгари, Трисанчи, Кудагу, Хуршни, ЧIишили ва Кьялкни шимала адамтани ванзалис 100 процентла налогуни дедили сари», — буриб НухIкьадиевли.

НухIкьадиевла докладлизирадти баянти пикрилизи касили, Жаруллагь ГIямаровли чедиб гьанбушибси масъала хIясибли, бузери жигарчеббарахъес хъарбариб УргIери, Хъярбук, Бускри, Кубачи и ДугIахъар шимала бургачи.

ГIур совещаниеличив гъайухъун лебдешла, муниципальный заказла ва юртани тIашдалтнила отделла начальник ГIябдуллагь Зайпуллаев.

Зайпуллаевли сунела длкладлизир чедетаахъили гьаладихьиб иш дусла цаибил байхъайзиб сунени бекIдеш дируси отделли барибси хIянчиличила баянти.