ДАССР-лис – 100 дус Республикала мер-мусакад…

АхӀерти дарганти, нушала республикала давлачебси тӀабигӀят саби. Дахадаевла районнизир биалли тIабигIятли ва адамли акIахъубти жагадешуни дахъал диънира дигеси саби. Районна гьарил шила ва ил-алавти мер-мусала тарихличила гъайвикIалли, дурестира камли ахIен. Илкьяйдали дубурлантани чула дурхъати ме-мусаличи мурталра пахрубиресра бирар.

Дубурлар Улкализир лерти цацадехIти тIабигIятла жагадешуни, гIур чинаралра агара. Амма децӀигули саби наб бахъал дагъистанлантани илдачила селра хӀебалухIели. Ил багьандан декIар-декIарти жагати мер-мусаличила баянти нушала газетализир гьаладихьес дигулра.

БегI гьалаб гьанбушес дигулра гъумла кӀиликӀ (бархан) Сары-кумличила. «Сары-кум» къумукълантала мезли «духъутӀа гъум» ибси саби. Дебали тамашала саби ил бархан, сабира дубуртала ургаб мерлабиубси. Секьяйда ил МяхӀячкъалала мякьлаб дакӀубиубсил аргъесра гьамадли ахӀен. ГӀялимтала пикри хIясибли, жяв замана дебали цӀакьси бурямли востокла улкназирад садухибти сари иша илцадра дахъал гъум. ГӀур дубуртази гӀяйхӀебиубли, гьаннала Къумторкъалала районизиб, МяхӀячкъала шагьарличибад 18 км гьарахъли мерлабиубли саби ил бархан. 3 километрлацад чIябар, 1175 гектарла ванза буцили саби Сары-кумли. Илала ахъдеш биалли, 262 метрличи абиули саби.

Гьанна илаб 12 градусла ванадеш саби. ДуцӀрумла дегӀлара дуцӀарти бурхӀнала манзил 60 градусличи абиркули бирар. Или биалра, дугели гъум дяргӀес бажардидиркули сари, ил багьандан илаб буцӀардеш бахъхӀи кавлули ахӀен.

Гъумла авлахъуначир хIердирути мицӀирагра дирар илар. Агъула чӀичӀлуми (гюрзаби) ва хъисхъни, тушканчикуни, хӀелхъни ва дахъал жура-журала, гӀур чинаралра хIедашути вава-кьарра.

Сары-кумла халаси бутӀа заповедниклизи кабурхуси саби, ил багьандан ила хӀядурдеш агарли адам укьес асухӀебирар. Амма ихтияр касили ила шадибгьуни дураберкIадалли, хъумхӀертеси архIя бетарар.