КАЛА-КОРЕЙШ МЕДИА
Меню
12+

«КАЛА-КОРЕЙШ МЕДИА"

11.06.2021 13:47 Пятница
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

ШапигI МяхIяммадов акIубхIейчирад -- 80 Жузала кьасиличивси хIечил лякьирикIули…

Автор: ХIяжимурад Ражабов

Урца кьасиличирад

Касили хIела жузи,

ХIу шулгIив кайибхIелин,

Дугьаилзулра хIечи.

Рахли някъла касасли

ХIела «ДигIянаси цIакь»,

Вирусра даим кьасли

Дила цIакьли балхес халкь.

БелчIес ибси пикрили

Сабирхъясли хIела «Неш»,

Хъучир арши иршули

Чериисра дила неш.

Ца гьигьличил белчIунра

ХIуни белкIунси «Кьисмат» -

Бирес бурсивиубра

Хьунул адамла хIурмат.

Эгер къимирдирасли

ХIела «Дигайла гими»,

Ну мурдаси айгъирла

Дузес кайрар дуклуми.

Аркура ну Пегасли

Назмуртала анхълизи,

ЛукIахъес иштяхI гили

Дила бухъна чархлизи.

«Хамха бухънабаалра,

Жагьли саб хIела уркIи.

Нуни буруси бара, -

БикIар ил набзи, — ЛукIен».

Нуни назмулизир гьандушибти ШапигI МяхIяммадовла жузи «ДигIянаси цIакь», «Неш», «Кьисмат» ва «Дигайла гими» сай поэтли наб пешкешдарибти сари. Гьайгьайра, гьар жузла мужаллатлис гIергъиси бяхIлизир илини наб делкIунти багъишлала дугьбира лер. ХIера ишди:

«ХIурматла ХIяжимурад Ражабов! Гьарбизунани, чархла арадешли, хъалибаргла талихIли, арати гIямрули шадварили дигуси автор. Дерхъаб! 27.02.2017 д.» («ДигIянаси цIакь» жузлизи белкIунси).

«ХIурматла ХIяжимурадлис! БегIла бекIсилибиубси чархлис арадеш, гьарбизуни, гьарил бархIи гьарзаси гьавли гIевурцули дигуси автор. Дерхъаб! 02.12.2019 дус» («Неш» жузлизи белкIунси).

«ХIурматла Ражабла ХIяжимурад! Шадти, ара-сагъти гIямрули, дигутала ва хIела гьарбизунани хIулуркIахъули дигуси автор. Дерхъаб! 03.07.2019».

Чедир поэтла наб делкIунти багъишлаби нуни дила макьалализир гьанхIедушесра асубири, рахли наб илини гибси сунела цагьатIи жузлизиб иш гIергъиси белкI хIебиалри: «В музей Народного поэта Дагестана Расула Гамзатова от автора. Июль 2018 года».

Поэтли набзи бурни хIясибли, наб пешкешбируси жуз илини, хатIаикили, Расул ХIямзатовла музейлизи гили буилри. Музейлизи лугуси наб гили сай. «Дигайла гими» бикIуси саби ил жузлис. ИтхIели нуни поэтлизи Расул ХIямзатовла музейлизибичиб гIяхIли сунела жуз хIербирис ибти умутбирхьахъути дугьби дурибтири. Ну дила гъайлис къянахIейубра. Илала чеди, нуни ил жуз, жузала кьасиличиб хясали бицIахъес хIебатурли, цацахIели илабад кайсули, бучIулира вирус.

ШапигI МяхIяммадовла ил жузлизи кадерхурти делчIес гьамадти гехIел ва авал къяйла «дигайла гими» сари, ахIерти нушала газета бучIанти. Гьар белкIлизир поэтли наб дулгути «гьарбизуни» уркIи-уркIиларад нуни хIушабра дулгулра, хIушанира къимдарая илди пагьмучевси поэтла «дигайла гими».

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

1