Пайдалати баянти гьаладихьиб

Ишди бурхIназиб Дахадаевла районна Уркухъла шилизибси культурала Юртлизиб коронавирусличи къаршиси вирусличила баянти гьаладихьибси семинар-совещание бетерхур.

Балбуцлизир бутIакьяндеш дариб районна бекI Жаруллагь ГIямаровли, илала заместительти ГIябдулхIямид Жамаловли, Рабазан НухIкьадиевли, Артур ХIямзатовли, республикала чейхъути излумала ва СПИД-ла центрла бекI тухтур Равгьаният Мирзаевани, изала чехIейснила шайчибси излумала кафедрала доцент Саният МяхIяммадовани, РЦИБ-ла СПИД-ла качествола (даражала) отделла начальник Разият МяхIяммадовани, районна больницала бекI тухтур МяхIяммадсалам ГIябдусаламовли, больницала медицинала хIянчизартани, мугIяллимтани ва ахъбуцибси масъалаличила баянти аргъес дигути цархIилти адамтани.

Семинар ибхьули муниципалитетла руководитель Жаруллагь ГIямаровли багьахъур илди гIяхIли бакIнила мурад ахъбуцибси масъайчила баянти аргъни ва илдазибадли пайдаласигъуна касни саби или.

«БегI гьалабси яргализиб тухтуртани, мугIяллимтани, социальный хIянчизартани вакцинаби дарес хIяжатбиркур. СенахIенну изала чейхънила урехи илдас имцIали саби», -- буриб Жаруллагь ГIямаровли.

Семинарличир Разият МяхIяммадовани привывка дакIубухъниличила ва ил бегI гьалаб чили барибсил баянти гьаладихьиб. Илкьяйдали илини аргъахъиб вакцина се сабил ва ил барахъибсилис сегъуна пайда лебал.

Вакцина – ил медицинала биологияла гIягIниахълумазибадли барибси препарат саби, суненира организмализиб изала чехIейсни (иммунитет) алкIахъули саби ва гьарли-марси антигенничи къаршидеш дирули сари. Вакцинализиб леб агент, суненира изала дакIубирахъниличи мешубиркуси микроорганизм лебни гьанарахъуси, имцIаливан ил хIядурбируси саби бебкIибси яра хIярхIкабиубси микроблизибадли. Ил бегI гьалаб балкьаахъурсири Англияла тухтур Эдвард Дженнерли.

Гам-Ковид-Вак ва ЭпиВакКорона препаратуначила баянти дуриб изала чехIейснила излумала кафедрала доцент Саният МяхIяммадовани. Илини ил масъайчи пикри бяхIчиаахъиб медицинала хIянчизартала. Илди баянти багаладирути сари пациентли суалти лугухIели, жавабти чардатес багьандан.

Илкьяйдали вакциналичила ва ил пайдалабирниличила цалабикибтала гьалар гъайрухъун РЦИБ-ла ва СПИД-ла бекI тухтур Равгьаният Мирзаева. Илини аргъахъиб вакцинала кьадриличила ва илала пайдачебдешличила.

Районна больницала бекI тухтур МяхIяммадсалам ГIябдусаламовли сунела яргализиб багьахъур чейхъути излумачи къаршиси бегIлара пайдаласи ва камти харжаначилси ил тяхIяр биъниличила. Ил чейхъути излумачи къаршили пайдалабируси ишбархIила медицинализиб машгьурси ва хьулчилибиубси бетуц саби. Илгъуна кумек матъал бируси саби.

Балбуцла ахирличиб Жаруллагь ГIямаровли гIяхIлас баркалла багьахъур районна адамтас илдигъунти пайдалати багьахъниби гьаладихьни багьандан, вакцинабала кумекличил лебталалра иммунитет имцIабирар ва COVID-19-личи къаршили дургъес имкантира дирар.