Жагьилти гIеббурцуси балбуц

Ишди бурхIназиб Дербент шагьарлизибси багьудила ва культурала Дагъиста академиялизиб саби гIяхIулали цалабикибтала форум дураберкIиб. Ила цалабикиб Югла мер-мусала округла 14 муниципалитетла жагьилти.

Дахадаевла районнизибадти Мадина МяхIяммадовани бекIдеш дируси жагьилтала активистунала кьукьялира бутIакьяндеш дариб форумличир.

Форум дураберкIибси саби жагьилтала баркьудлумала шайчибси Министерстволи «Центр развития добровольческих инициатив» ДРОО-личил барх.

Ил балбуц хасбарибсири саби гIяхIулали дурадуркIути кьиматчерти баркьудлуми гьаладяхI дукес, муниципалитетуназиб волонтертала (кумекчибала) бузери жигарчеббарес, пагьмучебти ва саберхурти жагьилти гIеббуцес багьандан.

Шадлихъла аги-хIяйзиб абхьиб форум. Республикала жагьилтала центрла директорла заместитель Рашид ГIябдуллаевли цалабикибтас баркалла багьахъур ва жагьилтала политикала шайчирти организациябала ункъли бажардибиркути руководительтас ва актисистунас грамотаби дедиб. «Доброволец России» конкурсла баянтачил цалабикибти тянишбариб. Заявкаби лугнила жураличил илди тянишбариб ва социальный проект бархьли бирцIахъниличила буриб. Илкьяйдали илини аргъахъиб форумла бутIакьянчибас сегъунти имканти дирутилра.

Балбуцла кIиибил бутIализир форумла бутIакьянчибас командаби цаладирхънила, интерактивный хIязани дурадуркIнила, коммуникативный тяхIярли узес бурсиварнила тренингуни дурадеркIиб.

Багьудлумала шайчибси бутIа ДР-ла жагьилтала Министерствола хIянчизар, «Машук» форумличиб Дагъиста делегацияла руководитель Ильгар Лелаевли ва социальный тяхIярли проектуни дурадуркIнила тренер-эксперт Мирза Аббасовли социальный тяхIярли проектуни дурадуркIнила тренингличибадли бехIбихьиб.

Теориялашалси бутIа таманбиубли гIергъи, командабала гьала тIашбатурси масъала сабри социальный проект хIядурбарни, сабира камти харжаначил ва белгиси манзиллизиб арзес имкантачилси.

Дахадаевла районна командали жюрилизи кьимат кабатахъес гьалабихьиб мискинти хъалибаргунас ва чулахъти дурхIнас шимала адамтачил барх барибси кумекла акция.

«Дахадаевла район» МО-ла жагьилтала политикала бекI специалист Мадина МяхIяммадовани ил проектла кьиматчебдешличила ва ил гIурра гьалабхI башахъес хIяжатли биъниличила буриб:

«УркIи-уркIилабадси» («Всем сердцем») проектлизиб командали къайгъибариб бегIлара мягIничебсигъуна балбуц мискинти хъалибаргунас кумекбарни биъни чебаахъес. БекIлибиубсигъуна хIянчи сабри шимала бахъал адамти цалабиркути мераначи адамтас хIяжатти секIал цаладяхъяхъес хасдарибти ваяхI кадихьни. Ила гьарил адамли палтурти ва цархIилти гIягIниахълуми кадихьес вирар. Илгъуна баркьуди нушани пикрила дайлаб бирахъехIе ва гIурра гьалабяI аркехIе».

Балбуцла итогуни хIясибли, форумла бутIакьянчибас сертификатуни дедиб ва бегIлара жигарчебти бутIакьянчибас хъумхIертести савгъатунира дедиб.