Вакцинаби дирес даимбиубли

Ишди бурхIназир Дахадаевла районнизир вакцинаби дирнила хIянчи жигарчерли детурхули сари.

Россиялизиб январьла 18-личиб бехIбихьибсири коронавирусличи къаршити вакцинаби дирес. 18 дус биубти адамтачибадли бехIбихьили, илдала лугIилизиб 65 дус биубти ва гьатIира имцIали гIямру деркIибти саби гIяхIулатас дирути сари илди вакцинаби. COVID-19 вирусличи къаршиси ил вакцина матъал бируси саби.

Илгъуна вакцина бирусил яра хIебирусил гьарил адамли сунес дигуси тяхIярли масъала ирзуси саби, сенахIенну ил сай гIяхIулали бирусину.

Гьачамличиб-гьачам имцIабикIули саби илгъуна вакцина барес дигутала лугIи. БегI гьалар вакцинаби дарахъиб районна администрацияла хIянчизартани.

Вакцинаби дирутани гьала-гьала ахтардира дураберкIахъили, хIядурдеш бирули саби.

Административная комиссияла секретарь МяхIяммад ГIяхIмадхановли бурни хIясибли, ил кахси изайчилси дяви даимбиубли саби ва вегIлара вегIла гъамталара арадеш мяхIкамбирнила мурадличил кIел прививка дирнила фазализир процедураби дурадеркIес хIяжатси саби.

«Арадешлис урехи лебти адамтас вакцинаби дирнила гIяхIдешличирли бубкIути адамтала лугIи камбирар, больницабас хIянчи кункдирар. Амма коронавирус тIинтIбикIни тIашаэс хIейрар. ХIяжатсила кьадарлизир вакцинаби даралли адамтас, илхIели изала тIашаэс имканти алкIан», — буриб МяхIяммад ГIяхIмадхановли.

ГьанбиркахъехIе, 100 дозаличилси цаибил партия таманбиубли, гIурра 300 доза хили сари.

Районнизиб 65 дус биубтас ва гьатIира имцIали дусми деркIибтасра вакцинаби дирули сари.