Россияла «Софиум» бикIуси Олимпиадала бутIакьянчи ретаур

Низам-кьяйда диркIнила масъултала ва декIарбирнила бетуцла шайчибси лебил Россияла бучIантала Олимпиадала ахирласи бутIала баянти хIясибли, Дахадаевла районна «ГI. Абу-Бакарла уличилси Уркухъла дахъал шалубар гимназия» МБОУ-ла ручIан ПатIимат ХIяжиева илала финалистка ретаур.

Мартла 1 ва 2-личиб Россияла дайхъалара-сера регионтазибадли Москвализибси О. Е. Кутафинна уличилси Университетлизиб (МГЮА) лебил Россияла «Софиум» бикIуси Олимпиадала ахирласи бутIализир бутIакьяндеш дарес багьандан бучIанти цалабикиб. Абзлизир бутIакьяндеш дариб чедирти классунала 99 бучIантани. 48 дурхIя 10-ибти классуназибадти ва 51 дурхIя 11-ибти классуназибадтири илди.

Олимпиада дураберкIибсири Россияла ЦИК-ла, Россияла Минпросвещенияла, Россияла Федерацияла субъектуназирти избирательтала комиссиябала ва ЦИК-лизибси МГЮА-ли гIеббуцибси РЦОИТ-ла кумекличил.

Дагъистайзиб, лебилра улкализибван, цаибил бутIа бетерхурсири 2020 ибил дусла ахирличиб. Ил дураберкIибсири гьарахъдешличи бузнила тяхIярлизиб ва декIар-декIарти даражлумала викторинабалара олимпиадабалара абзаназиб чедибикибти ва призерти алавбуцили. Олимпиадала регионна бутIа дураберкIибсири ДР-ла Избирательтала комиссияли ДР-ла багьудила ва гIилмула Министерстволичил барх. Ил дураберкIнила мурад сабри финаллизиб дурабуркIуси олимпиадала бутIализир бутIакьяндеш дарахъес багьандан кандидатуни чеббикIни.

11-ибти классунала бучIанти-ургабси ахирласи бутIализир бутIакьяндеш дариб чеббиркIнила бутIализир чедирикибси Уркухъла дахъал шалубар гимназияла ручIан ПатIимат ХIяжиеванира.

Дагъистайзирадси ручIанни Олимпиадала абзла кIел бутIализир бутIакьяндеш дариб. Мартла цаличир тестанала журализирти къиянти хъарбаркьуни тамандирутири. Ила кадурхулри Россиялизир дурадуркIути избирательтала тяхIяр-кьяйдала, выбортала ва референдумтала шайчирти ишбархIила закон бузахънила тарихлизирадти масъулти.

КIиэсил бутIа мартла 2-личибри. Ил бетерхур хIязла журализиб. Илар гьаладихьибти хъарбаркьуни тамандарес багьандан абзла бутIакьянчибани избирательтала ихтиюртала ва бетуцла шайчирти мурхьти багьудлуми чедаахъес хIяжатлири. Илдигъунти масъултачи вяхIягес вируси сай выбортачир тIамри дедлугухIели.

Илкьяйдали, ПатIимат ХIяжиева гIякьлу-дагьрила даража белгибирути абзанала баянти хIясибли, Олимпиадала ахирласи бутIализир финалистка ретаур.