КАЛА-КОРЕЙШ МЕДИА
Меню
12+

«КАЛА-КОРЕЙШ МЕДИА"

12.03.2021 13:08 Пятница
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Шадлихъла аги-хIяйзир детерхур

Автор: У. Ганиева

Хьунул адамтала байрамлис хасдарибти шадлихъла далдуцуни детерхур гьаларван Дахадаевла районна культурала учреждениебазир.

Илкьяйдали, Уркарахъибси шими-ургабси централизованный культурала-бамсриихънила центрли-зиб Сиражутдин ГIябдуллаевла, МяхIяммад ГIяллаевла, Арсен ХIясановла, ПатIимат Мажидовала, ХIямид Рабазановла ва цархIилти далайчибала бутIакьяндешличил шадлихъла концерт дураберкIиб.

Нешанала, рузбала, рурсбала ва гIямрула марти гьалмагъунала хIурматлис зайдикIи илхIели далайла ва делхъла агурби. Цалабикибти разидешличил гьунибиулри гьарил гIяртистлис.

Балбуцличив хьунул адамти мубаракбирули, гъайухъун районна культурала отделла начальник ХIясбуллагь Мусаев. Камли ахIенри ил бархIи хьунул адамтас цархIилтани дурути уркIи-уркIиларадти ванати мубаракла дугьбира.

8-ибил мартла байрамла БархIилис хасбарили Кубачила шилизибра культурала хIянчизартани «Гьу-гьария, рурсби!» ибси конкурсла программа хIядурбарилри. Зайдухъун иларра хьунул адамтас мубаракла дугьбира. Жагьилти булхъулри, назмурти дучIулри ва цалабикибтас халаси разидеш пешкешбирулри.

Морскоелизибти культурала хIян-чизартанира «Мартличиб илгъуна бархIи лебси саби» ибси 8-ибил мартла байрамлис хасбарибси шадлихъла программа чебаахъиб. Балбуцличиб гъайбикIи нешла черяхIдешличила, гьалмагъ хьунул адамла мардешличила, хала нешличила… Цалабикибтас хаслира халаси разидеш хиб биштIатани. Илдани сценаличирад чула пагьмурти устадешличил чедиахъулри.

Балбуцла ахирличиб лебилра чайла бержахъес жибариб ва цахIнабси сурат касиб.

ДурхIнани имцIаливан суратунала кумекличил чула хIялани иргъахъули бирар. БиштIахIейчибадли дурхIнани чула аргъайзир кавлути секIли суратдарес дигахъу илдас. Илгъуна секIал пикрилизи касили, Кьялкнила шила шими-ургабси центрлизибра дурхIнала суратунала конкурс дураберкIиб. Халаси иштяхIличил илдани чула нешанала суратуни дариб ва жагали рангдариб. ХIебла вавнала жагати халубира суратдариб. Культурала хIянчизартани баянти гьаладихьиб 8-ибил мартла байрам акIахъниличила ва чула гъамти хьунул адамти ил байрамличил секьяйда мубаракбирутил биштIатас гIеббуриб.

Трисанчила шилизиб культурала хIянчизартани хьунул адамтала байрамлис хасбарибси «ХIяй-ранвирахъуси образ, жагаси образ» ибси уличил шадлихъ дураберкIиб. Центрла художественная самодеятельностьла бутIакьянчибани жагаси концерт чебаахъиб ва нешанас хасдарибти назмурти делчIун.

Зилбачила шилизиб культурала хIянчизартани школала бучIантачил барх «Нушани хьунул адамтас вавни пешкешдирулра» ибси барбуц дураберкIиб. ЦТК-ла художественный руководитель ПатIимат МяхIяммадовани шила лебилра хьунул адамти мубаракбариб ва илдас хасбарибси байрам акIахъниличила баянти дуриб. БучIантани далуйти, назмурти делчIун.

Дибгашила шилизир культурала хIянчизартани миллатла берклуми хIядурдирнила мастер-классуни дурадеркIиб.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3