ГIяхIгъабза бакьлан – мугIяллим Мирзаев Минатуллагь 55 дус виънилис

Дурхъати хIядисунен

ХIяланазив хIялалси,

ХIурхъала дубураван

ХIял-тIабигIят паргъатси.

Мурталра кабизчевси,

Мар-мургьиван умуси,

Муридешличи мирхъен

Мартачи гьавикIуси.

Унра шантала хIурмат,

УркIи гьаргли бируси,

ГIямултачи гIямрула,

ГIелавад дуцIхIевхъунси.

Кьясдешла кьяьк агарси

Кьуватлис гапхIейкIуси,

Къарчигъали къумбиван,

Къуртмаби гьабирхъуси.

Шадлихъла мявализив,

АнцIхIевкьесли ватулхъан,

ХIяя, сабур, адамдеш,

ХIегъхIерили хIердиран.

Мегь-бетонна тIал кьяйда,

Бурибси гъайлис марси,

ГIярабла чатIаливан

АкIубси мер хъумхIертан.

КьяшмикIуназир кьяшмен,

Кьамлизив валикибси,

Хала бегIти асилти

Гьаман гьанбиркахъуси.

Микелли бамсри ахъес,

Гьалмагъуначил биган,

Балагьлизи бикибтас,

Кумекла някъ гьабалтан.

Мар, къяналис хIейцибси,

Адамдеш хIерибси гъурш,

Бархьдешла берхIилиуб,

Кайуси гIямрула гъарш.

Гъазализи Нарт кьяйда,

Биру-баркьлизи калзан,

Дергаван дяизурси

Дару дерубси бакьлан.

ХIериаби дигили

УркIи либхIли бицIили,

ДуцIрумла аргъ-бархIиван

Алавтачил варшили.

Шайх Рабаданов.

Урагъила ши.