ГIяхIтачила кам-гьамли

Иш макьалализиб наб бурес дигулра Уркухъла поликлиникализир рузуси камти гIямрула хьунул адам Кьурбанова Алеса Кьурбановначила. Ил акIубси сари I990-ибил дуслизир Уркухъла шилизир, хъубзарла хъалибарглизир. Алеся ручIули калун сагаси Уркухъла шилизир. Школа таманбарили гIергъи, илини кьасбариб белчIуди гIурра даимбарес. А. Кьурбанова Астраханский медицинский университетлизи карерхур. Ил таманбарили Астрахан шагьарлизибси поликлиникализир рузули калун.

ХIера, Уркухъла поликлиникализив хIулбала тухтур агни багьандан ил ила шуррухъун. СенахIенну сари акIубси шилизи ракIес ва рузес дигулри. Гьанна дусра сера илар рузули сари.

20I7-ибил дусла апрельла бехIбихьудличир Алеся офтальмологли рузес рехIрихьиб. Илала бузери бегI гьалабси бархIиличибад бакIибси ахтардили, сабира Дагъистан Республикала министр Танка Ибрагьимов ялчи архIяличил Уркухъла шилизи вакIибхIели дураберкIибси, ахъли кьиматлабариб.

Нура иличи дугьаризурра дилара хIулбала шала нукьсанни сабхIели. Алесяни аппаратличил хIеррикIули хIяжатси тахIярли дармунти делкIун ва илди дарахъес маслигIятбариб.

Поликлиникала заведующийли, сунечил барх бузути хIянчизартани, иличи дугьабизуртани илала хIянчи гIяхIсилизи халбариб. Заведующий викIи: «Алесягъунти биаб цархIилти тухтуртира».

Ну ил рузуси кабинетлизи рухIнарухъунхIели илини бегI гьалаб школализи аркьути биштIати дурхIнала хIулбала арадеш ахтардибирули ва илдас хIяжатти справкаби лукIулри раргира. ИлхIели илини сунела хIянчи чебетаахъили бирули биъни багьеслири, бяхIлизи чекахъибти суратуни хIясибли.

Нуни хьарбаира цархIилти поликлиникала хIянчизартазира. Раисат Будаевнани, Разият Идрисовнани ва цархIилти тухтуртани дурути гъай цагъунти сарри: гIяхIил секIал балуси, сунела санигIятличи чекаризурси сарлин буриб.

Алесяни делкIунти дармунти дарибхIели дила хIулбала гъяж гIяхIбухъун. Илини мурталра буру, нуни кумекбарес хIерирути изалала бегIти, операциябачи Касписклизи ва МяхIячкъалализи бургьули рирус.

Баркалла биаб хIед, Аллагьли гIерруцаби дила рурси. Ца хIябал назмула тугъ илис пешкешдирулра.

Къяна къалпдеш агарси

Гьарилличил ралгунси,

Сарири хIу мешуси

Зубрала муъминтачи.

ХIела уркIи бицIили

Адамтачи дигили,

ГIяхIбаркьлисцун багьи хIу

Мурталра хIядурсири.

Пагьмуртала хазнаби

ДуртIули хIерриаби,

Рааби мурадличи

ХIулби цIудар Алеся!