ДурхIнани бамсриихъу

Дахадаевла районна администрациялизиб дурхIнани дуцIрумла манзиллизиб бамсриихънила масъала хIербариб. Ил масъайчила июльла хIябличиб дураберкIибси заседаниеличир сунесра районна бекI Жаруллагь ГIямаровли бекIдеш дируси, муниципалитетла структурабала подразделениебала руководительтани бутIакьяндеш дариб.

Балбуцличир дурхIнани дуцIрумлизиб арадеш ункъбирахънила мурадличил бамсриихъни гIяхIил бетерхахъес хIяжатли биъниличила гъай детаур.

ДурхIнала арадеш ункъбирахънила балбуцла башрличила бурули гъайрухъун районна дурхIнала творчествола юртла директор Светлана Мирзаева.

«Гьаларти дусмазибван иш дуслизибра лагерьтази ва цархIилти бамсриихъути меранази районна багьудила учреждениебала 1500 дурхIя дуцIрумла манзиллизиб бархьес пикрибарилра.

ДуцIрумлизиб дурхIни имцIаливан спортла хIязанази ихъур. Илдала лугIи 600-личибра имцIали бирар.

«Солнечный берег», «Надежда», «Волна», «Костёр», «Планета», «Орлёнок» ибти лагерьтази 800 дурхIя бурхьути саби. ИшбархIи бамсриихъутала лугIи 263 саби», — буриб Мирзаевани.

ГIур муниципалитетла руководительли школала гIямруличи ахIебаибтани бамсриихъниличила ва илдала арадеш мяхIкамбирнила мурадличил дурадуркIути баркьудлумала сияхI цалабяхъниличила хабарасиб.

«БегI гьалабси яргализиб гьарил лагерь хасбарибси саби духIнала арадеш мяхIкамбирнилис. Арадеш мяхIкамбирнила далдуцуни тухтуртала кумекличилцун ахIен дурадуркIути, ил баркьудилизи битIикIути саби социальный педагог ва психолог. Илдани дурхIнала излумала дурарадли, сегъунти челукьути лерал белгидиру ва хIяжатси кумек гIеббиахъу. Чула лерилра бетуцуни пайдаладирули илдани дурхIни саби-сабил пикрибикIахъес, гьалабяхI башахъес ва илдала бухъя-зегъа ункъдиахъес кумекбиру», — или буриб Жаруллагь ГIямаровли.

Балбуцла ахирличибра муниципалитетла бекIли ахъбуцибси масъалала шайчибси хIянчи ункъбарахъес хъарбариб. ГIур ишкьяйда буриб: «ДуцIрумла замана бамсриихънили дурхIни саби-сабил бузахъес бурсибиру, гьабкьябигъунти декIарбарахъес, дурхIнала бархбасуни чIумадиахъес кумекбиру. Гьарил дурхIялис имканти алкIан ункъли бамсриахъес ва каникультала замана сунела зилантачил бархбас чIумабиахъес».